Presidenti i Serbisë, Aleksandar Vuçiç, tha se serbët në veri të Kosovës do të kenë gjithmonë mbështetjen e tij për kërkesat e tyre. “Unë nuk do të fshihem nga të mëdhenjtë dhe të fuqishmit e botës; Do të jem gjithmonë i përgjegjshëm për tju bërë thirrje që të ruajnë paqen, sepse paqja është në interesin më të mirë të serbëve dhe të Serbisë, si dhe të popullit tonë në Kosovë”, tha Vuçiç në një video-adresim të publikuar në llogarinë e tij në Instagram.Mesazhi i tij erdhi në ditën kur disa qytetarë serbë u mblodhën në një protestë në fshatin Rudarë në veri të Kosovës, për të kundërshtuar, ato që i konsideruan si “kërcënimet” e kryeministrit të Kosovës, Albin Kurti. Grupe qytetarësh serbë kanë ngritur barrikada në veri të Kosovës që nga 10 dhjetori, duke mbajtur të bllokuar këtë pjesë të vendit. Për t’i hequr barrikadat, grupet e serbëve kërkojnë lirimin e një ish polici serb që u arrestua si i dyshuar për sulmet kundër zyrave zgjedhore në veri. Autoritetet e Kosovës kanë thënë se kanë kapacitete për heqjen e barrikadave, por se janë duke i dhënë kohë misionit të NATO-s, KFOR, që ta bindë komunitetin lokal që t’i zhbllokojë vetë rrugët. Kryeministrja e Serbisë, Ana Bërnabiq, tha të enjten se KFOR-i nuk i është përgjigjur ende kërkesës së Serbisë për të dërguar deri në 1.000 forca serbe në Kosovë. “Ne presim ende një përgjigje për këtë kërkesë”, tha Bërnabiq.