Ambasada gjermane në Prishtinë ka përgënjeshtruar pretendimet e ministrit të Brendshëm të Serbisë, se Gjermania ka nën mbrojtje një person, që Beogradi dyshon se ka vrarë politikanin serb nga veriu i Kosovës, Oliver Ivanoviç. Ambasada gjermane tha se nuk ka dijeni se kush e ka vrarë Ivanoviçin më 16 janar 2018. “Deklaratat që thonë se autori i vrasjes është nën mbrojtjen e autoriteteve gjermane nuk janë të vërteta. Qeveria gjermane nuk ka pranuar asnjë kërkesë nga autoritetet serbe për këtë çështje”, tha ambasada. Një ditë më parë, ministri i Brendshëm i Serbisë, Bratisllav Gashiç, tha se autoritetet serbe “e dinë saktësisht” se kush e ka vrarë Ivanoviçin. Ai tha se policia serbe e ka kërkuar nga autoritetet gjermane këtë person që është “nën mbrojtjen e tyre”. “Ne kemi video nga aeroporti i Tiranës, kemi fotografi nga Prishtina”, tha Gashiç, pa ofruar detaje apo dëshmi të tjera për të mbështetur këto pretendime. Kjo nuk është hera e parë që autoritetet serbe deklarojnë se e dinë emrin e vrasësit të Ivanoviçit. Më 2019, presidenti i Serbisë, Aleksandar Vuçiç, përmendi emrin e shqiptarit nga Kosova, Florim Ejupi, i cili jeton në Gjermani. Vuçiç kërkoi nga ndërkombëtarët se pse autoriteteve hetuese të Serbisë nuk po iu jepen pamjet e kamerave nga aeroporti i Tiranës, për, siç tha ai, “lëvizjen sekrete të personit të quajtur Florim Ejupi, i cili është nën vëzhgim në Gjermani”. Sipas mediave në Kosovë dhe Serbi, Ejupi më pas kishte njoftuar policinë gjermane se emri i tij është lidhur me vrasjen e Oliver Ivanoviçit, por autoritetet gjermane i thanë “të mos shqetësohej për atë rast”.