Këtë të martë banorët e zonës së Laparakës janë ngritur në protestë kundër shembjes së banesave. Kjo protestë erdhi si pasojë e zgjatimit të Unazës së Re, gjë e cila rrezikon shembjen e 700 objekteve. Të paktën kështu paraqitet në projekt. Të shumtë kanë qenë banorët të cilët janë ngritur në protestë, duke bllokuar rrugën me koshat e plehrave dhe me automomjetet e tyre. Banorët janë shprehur se kanë mungesë informacioni në lidhje me projektin e Unazës së Madhe dhe se janë të shqetësuar për të ardhmen e tyre. Kjo në fakt është protesta e tyre e pestë. Banorët kanë pretenduar se ky projekt favorizon njerëz të pushtetshëm pranë qeverisë dhe njëkohësisht banesat që duhet të shemben janë përzgjedhur. Shpronësimi i banesave nuk është bërë ende dhe ata kanë kërkuar vlerësim më çmimin e tregut, ndërkohë që kanë bërë me dije më herët se protestat e tyre do të përshkallëzohen nëse nuk gjendet zgjidhje.