Policia e Tiranës ka dhënë detaje në lidhje me operacionin e zhvilluar ditën e djeshme në zonë e Liqenin të Thatë në Tiranë ku mbetën të arrestuar 5 persona, pjesëtarë të një bande që vidhte nëpër banesa. Në pranga kanë rënë Dorjan Lamani (Qirjazi), Klodian Çypi, Halil Topalli, Redian Begaj dhe Dajvid Dosti. Sipas uniformave blu në bashkëpunim me njëri-tjetrin, janë kapur në flagrancë menjëherë pas kryerjes së vjedhjes në një banesë te kompleksi i vilave pas qendrës tregtare “TEG”, ku kanë marrë një shumë të konsiderueshme në euro, bizhuteri dhe sende të tjera me vlerë. Ata akuzohen për “Vjedhje me pasoja të rënda” e kryer në bashkëpunim “Sigurimi i mjeteve për vjedhje”, “Mbajtja pa leje e armëve, armëve shpërthyese dhe e municionit” dhe “Grupi i strukturuar kriminal”. Nga hetimet e deritanishme rezulton se këta persona, pasi siguronin informacione dhe piketonin banesa ku kishte shuma parash dhe bizhuteri, organizonin dhe kryenin vjedhjen e tyre. Materialet i kaluan Prokurorisë së Rrethit Gjyqësor Tiranë për zbardhjen e plotë te ngjarjeve të tjera në të cilat mund të jenë të përfshirë këta persona.