Vespa mbushi të premten 75 vite jetë. Enrico Piaggio, paraqiti kërkesën për patentim më 23 prill 1946 dhe po atë vit nisi edhe prodhimin e 2 mijë ekzemplarëve. Por, nuk do ta kishte imagjinuar kurrë që krijimi i inxhinierit aeronautik Corradino D’Ascanio, do të mund të ishte bërë një ikonë globale, me më shumë se 19 milionë modele të shitura në të gjithë botën. Shumë më tepër se një skuter, Vespa, ka mishëruar për shumë gjenerata lirinë e lëvizjes. Në mënyrë të lehtë, argëtuese, rinore por gjithnjë me një lloj emocioni për këdo që është ulur në të. Kinemaja, letërsia, muzika, janë frymëzuar të gjitha nga vespa që mund edhe të thuhet se ka qenë marka e parë vërtetë globale e industrisë motoristike. Enrico Piaggio e kishte imagjinuar atë si një pikë bashkimi mes gjeneratave dhe pas 75 viteve mund edhe të thuhet se ka goditur në shenjë. Dhe në këtë 75 vjetor, motori vjen me një edicion special, të kufizuar, në cilindrata të cdo tipi dhe ngjyra të ndryshme, bashkë me vespën elektrike që ecën kështu me hapin e kohës.