Gjykata për krimet e luftës la në fuqi dënimin për gjenocid të ish-shefit ushtarak të serbëve të Bosnjes, Ratko Mladic, për masakrën e Srebrenicës, ngjarja më e përgjakshme në Evropë që prej luftës së II botërore. Gjykata e Hagës e refuzoi apelin e Mladic kundër dënimit me burg të përjetshëm që mori në 2017, për gjenocid, krime lufte dhe krime kundër njerëzimit gjatë luftës së Bosnjes në vitet 1992-1995. I njohur si “kasapi i Ballkanit”, ish-gjenerali që tani është në të ’70-at, e priti vendimin me kufje në vesh dhe pa tradhëtuar asnjë emocion, ndërkohë që u lexua nga kryegjyqtarja Prisca Nyambe. Vendimi i pesë gjyqtarëve të gjykatës së Hagës, e cila trajton ceshtjet e krimeve të luftës, është i formës së prerë dhe nuk mund të apelohet më tej. “Sot është një ditë historike, jo vetëm për neve nënat, por për gjithë Ballkanin, Evropën, dhe mbarë botën,” tha Munira Subasic, presidente e shoqatës së “Nënave të Srebrenicës”, pas dhënies së vendimit. “Ai është një monstër që nuk është penduar për ato që ka bërë, as pas 26 vitesh. Kudo që shkoi ushtria e tyre, kudo që shkelën cizmet e tyre, ata kryen gjenocid,” shtoi ajo.