Rajoni veri lindor i katalonjës, në spanjë, ka vendosur të mbyllë baret dhe restorantet për 15 ditë nga e enjtja ndërsa vendi përpiqet të ngadalësojë përhapjen e koronavirusit. Spanja, aktualisht ka një nga shkallët më të larta të infektimit në evropë, me rreth 900 mijë infektime dhe më shumë se 33 mijë viktima. Rajoni i katalonjës ka shënuar një rritje të re të infektimeve, pasi më herët u duk se i vendosi ato nën kontroll kur urdhëroi njerëzit të qëndronin në shtëpi në barcelonë dhe qytete të tjera. Të mërkurën, lideri në detyrë i katalonjës, Pere Aragones tha se duhen masa më drastike për të evituar një izolim të plotë në javët në vijim. Restorantet në rajonin me rreth 7.5 milionë njerëz do të lejohen të shërbejnë vetëm ushqim për të marrë me vete ndërkohë që njerëzit janë këshilluar të qëndrojnë në shtëpi. Palestrat dhe eventet kulturore do të lejohen të operojnë vetëm me gjysmën e kapacitetit ndërsa dyqanet dhe qendrat e mëdha tregtare duhet të kufizohen me 30 për qind të kapacitetit. Banorët e kryeqytetit spanjoll, Madridit, janë ndërkohë nën izolim të pjesshëm dhe nuk munden të dalin nga qyteti. Ndërsa baret dhe restorantet atje mbyllen në orën 23.00.