Shtetet e Bashkuara dhe Kina kanë arritur një marrëveshje kornizë lidhur me platformën TikTok. Akordin në parim e ka konfirmuar Sekretari i Thesarit të SHBA-së, Scott Bessent. Sipas tij, marrëveshja parashikon që pjesa amerikane e TikTok të kalojë në pronësi amerikane, duke shmangur ndalimin e saj në territorin e SHBA-së. Presidenti Donald Trump e quajti vendimin një fitore për të rinjtë dhe konfirmoi se më 19 shtator do të zhvillojë një bisedë me presidentin kinez Xi Jinping për të diskutuar çështje më të gjera tregtare dhe teknologjike. Bisedimet SHBA-Kinë po zhvillohen në Madrid dhe pritet të zgjasin deri të mërkurën, ndërsa tensionet mes dy vendeve mbeten të larta. Trump ka vendosur të mbajë tarifat mesatare 55% për mallrat kineze deri më 10 nëntor. “Siguria kombëtare mbetet prioritet,” deklaroi Bessent, duke shtuar se marrëveshja është ndërtuar mbi baza të drejta tregtare dhe respekt për shqetësimet e ndërsjella.