Në një fushë të gjerë, avionët luftarakë rusë dhe bjellorusë hapën zjarr ndërsa tanket shkatërruan shtëpi të improvizuara prej druri dhe zhurma e dronëve mbushi ajrin. Pak çaste më vonë, trupat hynë me forcë, duke ngritur flamujt e aleatëve mbi një copë toke të “çliruar” të konsumuar nga flakët. Ishte kjo panorama e stërvitjeve ushtarake Zapad-2025 dhe e organizuar në poligonin e stërvitjes Borisov në Bjellorusi, që u cilësua si një përgjigje mbrojtëse ndaj një pushtimi imagjinar perëndimor - në fakt të NATO-s. Zapa , që është fjala ruse për "perëndim", i referohet stërvitjeve ushtarake të përqendruara. Megjithatë, shfaqja e fuqisë së zjarrit, e dëshmuar gjatë një vizite të rrallë të medias perëndimore në shtetin autoritar të Bjellorusisë, ka ngjallur shqetësim në kryeqytetet evropiane mes tensioneve rajonale në rritje dhe frikës se Moska po heton mbrojtjen e NATO-s pasi dronët rusë hynë në Poloni dhe Rumani javën e kaluar. “Stërvitjet, sipas mendimit tonë, janë të hapura në mënyrë të paprecedentë. Ne nuk paraqesim asnjë kërcënim për askënd dhe mbështesim ndërtimin e një dialogu konstruktiv dhe pragmatik”, u tha gazetarëve pas stërvitjeve Valery Revenko, një zyrtar i lartë ushtarak bjellorus. Ai shtoi se stërvitjet, që pritet të përfundojnë të martën, ishin zvogëluar për të nxjerrë në pah natyrën e tyre mbrojtëse dhe u mbajtën më larg kufijve të NATO-s sesa ishte planifikuar fillimisht, në atë që ai e përshkroi si një përpjekje për të ulur tensionet në Evropën Lindore .