Rheinmetall i Gjermanisë ka arritur një marrëveshje për të blerë një ndërtues anijesh luftarake, thanë zyrtarët në atë që është zgjerimi më i fundit i gjigantit të mbrojtjes për të përmbushur kërkesën në rritje ndërsa vendet evropiane nxitojnë të riarmatosen. Grupi gjerman do të blejë Naval Vessels Luerssen (NVL), degën ushtarake të prodhuesve të anijeve Luerssen Group, me seli në qytetin portual të Bremenit në veri të Gjermanisë. Kjo shënon një zgjerim të madh në mbrojtjen detare për Rheinmetall, tashmë një furnizues kryesor i pajisjeve, nga automjetet e blinduara deri te municionet, përfshirë Ukrainën, ndërsa lufton pushtimin trevjeçar të Rusisë. Vendet evropiane kanë qenë në garë për të forcuar ushtritë e tyre që nga pushtimi i Ukrainës nga Rusia në vitin 2022. Kjo shtysë është bërë akomë më emergjente nga thirrjet e Presidentit amerikan Donald Trump që kontinenti të paguajë më shumë për mbrojtjen e vet dhe vënia në pikëpyetje nga ana e tij e aleancës transatlantike. "Rheinmetall po zgjeron portofolin e saj për të përfshirë ndërtimin e anijeve detare", tha grupi me seli në Dyseldorf në një deklaratë për shtyp, duke treguar "rritje masive të kërkesës nga forcat detare dhe rritje të buxheteve të prokurimit". "Në sfondin e kërcënimeve në rritje, ne e konsiderojmë konsolidimin brenda industrisë së mbrojtjes si të nevojshëm dhe të arsyeshëm", shtoi ai. Rheinmetall, aksionet e të cilit u rritën me 2.4 përqind në Frankfurt pas lajmit të marrëveshjes, tha se qëllimi ishte që transaksioni të mbyllej në fillim të vitit 2026, në varësi të miratimit rregullator. NVL ka katër kantiere detare në Gjermaninë veriore dhe gjithashtu ka degë në të gjithë botën. Kompania me histori 150 vjecare, punëson rreth 2,100 njerëz në nivel global. Ajo ka ndërtuar rreth 1,000 anije ushtarake dhe i ka dorëzuar ato në marina dhe roje bregdetare në të gjithë botën. Grupi Luerssen tani do të përqendrohet vetëm në ndërtimin e mega-jahteve civile. Rheinmetall hapi fabrikën më të madhe të municioneve në Evropë muajin e kaluar, në Gjermaninë veriore, e aftë të prodhojë 350,000 predha artilerie në vit.