Zëdhënësi i Kremlinit, Dmitry Peskov, tha të hënën se NATO është tashmë e përfshirë në një luftë “de facto” me Rusinë. Sipas tij, Aleanca po ndihmon Ukrainën jo vetëm në mënyrë të tërthortë, por edhe drejtpërdrejt. “NATO-ja është de facto e përfshirë në këtë luftë. Ajo ofron mbështetje si indirekte, ashtu edhe të drejtpërdrejtë për regjimin e Kievit,” u shpreh Peskov gjatë një bisede me gazetarët. “Prandaj, mund të themi me siguri absolute se NATO është në luftë me Rusinë.”, shtoi ai. Peskov tha se nuk ka pasur lëvizje për organizimin e një takimi mes Rusisë, SHBA-së dhe Ukrainës. Megjithatë, ai theksoi se Moska mbetet e gatshme të gjejë një zgjidhje përmes bisedimeve. “Rusia ende ruan interesin dhe gatishmërinë për të zgjidhur krizën ukrainase me mjete politike dhe diplomatike,” tha ai, duke iu përgjigjur deklaratës së Donald Trump se “durimi i tij po mbaron”. Sipas tij, është Ukraina ajo që po e pengon procesin. Ndërkaq, vazhdojnë lëvizjet ushtarake në kufijtë lindorë të NATO-s. Orët e fundit edhe Italia ka vendosur të marrë pjesë në Operacionin “Roja Lindore”, duke dërguar dy avionë luftarakë Eurofighter. Po ashtu, Britania thirri ambasadorin rus të hënën pas shkeljes së hapësirës ajrore të Polonisë dhe Rumanisë nga dronë rusë. Sekretarja e Jashtme britanike dënoi veprimet dhe tha se NATO do të vazhdojë të mbështesë Ukrainën.