Ndërsa lufta në Ukrainë vijon, vendi po shndërrohet në laboratorin më të madh të inovacionit ushtarak në botë. Nga robotë tokësorë si “Termit” që shpëtojnë të plagosurit, deri te dronët ajrorë me inteligjencë artificiale, Kievi ka kaluar në një fazë revolucionare në fushën e teknologjisë së luftës, duke bërë që projektet e shtrenjta të riarmatimit europian të duken tashmë të vjetruara. Vetëm 25% e forcave të Ukrainës përdorin dronë, por ato janë përgjegjëse për 75% të objektivave të goditura. Sipas raportimeve, vendi prodhoi mbi 3.5 milionë dronë në 2025 dhe pret të arrijë mbi 6 milionë vitin e ardhshëm. Dronët e sulmit tashmë udhëhiqen nga kabllo optike 25 kilometra të gjata për të shmangur interferencat ruse, ndërsa dronët interceptues kanë filluar të zëvendësojnë raketat e shtrenjta të NATO-s në mbrojtje ajrore. Ushtria ukrainase ka decentralizuar blerjet – çdo brigadë ka buxhetin e vet për të porositur teknologji nga start-up-et e vendit. Ky bashkëpunim mes prodhuesve dhe trupave në terren ka nxitur një bum inovativ: mbi 800 kompani dhe 2,500 start-up-e janë angazhuar në mbrojtje. Janë krijuar mbi 4,000 produkte të ndryshme ushtarake vetëm nga sektori privat. Ukraina po zhvillon sisteme pa pilot që funksionojnë në mënyrë autonome, falë një baze të dhënash prej miliona videove të luftimeve me dronë. Kjo përbën një avantazh strategjik për trajnimin e inteligjencës artificiale, në një kohë kur edhe Rusia dhe Kina kanë filluar të ndjekin të njëjtin model. Kina, përmes bashkëpunimit me Rusinë, po përfiton gjithashtu nga aksesi në teknologjitë e dronëve të rrëzuar.