Forcat ukrainase kanë kryer një valë të gjerë sulmesh me dronë ndaj objektivave ushtarake dhe energjetike në Rusi dhe në territoret e pushtuara. Presidenti Volodymyr Zelensky deklaroi se është goditur edhe një objekt i sektorit të naftës në Armavir, duke theksuar se Ukraina po e çon luftën “aty ku ajo nisi”. Sipas ushtrisë ukrainase, operacioni shënjestroi 23 objektiva strategjikë, përfshirë infrastrukturë ushtarake në rajonin e Rostovit. Kievi pretendon se janë goditur një tanker i përdorur për transportimin e naftës së sanksionuar, një sistem raketor Iskander dhe dy avionë anti-nëndetëse Tu-142. Autoritetet ruse konfirmuan sulme me dronë në zonën portuale të Taganrogut, ku u raportuan zjarre në një tanker tregtar, një rezervuar karburanti dhe një ndërtesë administrative. Ndërkohë, në rajonin e Belgorodit, Moska tha se sulmet ukrainase kanë shkaktuar tre viktima civile dhe tre të plagosur.