Presidenti i Serbisë, Aleksandar Vuçiç, tha se do t’i drejtohet KFOR-it me kërkesë për lejimin e dislokimit të trupave ushtarake dhe policore serbe në Kosovë. “Ne u ramë dakord për tekstin që t’i dërgojmë një kërkesë komandantit të KFOR-it, në përputhje me Rezolutën 1244, për të siguruar dislokimin e pjesëtarëve të ushtrisë dhe policisë serbe në territorin e Kosovës dhe Metohisë, dhe vendimi i Qeverisë [për këtë çështje] do të merret të hënën ose të martën”, tha Vuçiç gjatë një konference për media. Ai tha se e di që kjo kërkesë do të refuzohet. “Por, është mirë që një ditë nuk do të thonë se nuk e kemi kërkuar kurrë dhe se asnjë qeveri nuk guxoi të kërkonte” dislokimin e trupave në Kosovë, tha presidenti serb. Sipas tij, KFOR do të gjejë "arsye të panumërta" për të dëshmuar se janë në kontroll të situatës. Por, Vuçiç paralajmëroi se Serbia do të kërkojë mënyra të reja ligjore për të arritur qëllimin e saj. Presidenti serb pretendon se sipas rezolutës 1244 të Këshillit të Sigurimit të Kombeve të bashkuara, Serbia ka të drejtë të kthejë forcat e saj në Kosovë. Misioni i NATO-s në Kosovë, KFOR, ndërkohë nuk ka bërë komente për këto paralajmërime të Serbisë. Paralajmërime të ngjashme për dërgimin e trupave në Kosovë kanë bërë më herët edhe kryeministrja serbe, Ana Bërnabiç, dhe shefi i Zyrës për Kosovën në Qeverinë serbe, Petar Petkoviç. Por, presidentja e Kosovës, Vjosa Osmani, ka deklaruar një ditë më parë se territorin e Kosovës nuk do të ketë më kurrë policë dhe ushtarë të Serbisë. "Kërcënimi i hapur për agresion policor e ushtarak nga ana e Serbisë dëshmon se në atë shtet vazhdon mendësia hegjemoniste", tha Osmani.