Ushtari i parë rus që po gjykohet për krime lufte në Ukrainë, kërkoi ndjesë në një gjykatë në Kiev, të enjten, ndërsa dha një përshkrim të detajuar se si ai kishte vrarë një civil në fillim të pushtimit. Unë deklarohem fajtor. E di se nuk do të mund të më falni, por sidoqoftë, unë ju kërkoj ndjesë për gjithcka që kam bërë. Reshteri rus, 21 vjecar, Vadim Shishimarin, foli në gjykatë duke iu drejtuar bashkëshortes së viktimës 62 vjecare që ai pranoi se e kishte vrarë në ditët e para të pushtimit. Ai përballet me dënim të përjetshëm në Ukrainë, nën akuzat për krime lufte dhe vrasje të paramenduar. Ai i tha gjykatës se e kishte qëlluar burrin ndërsa bashkë me disa ushtarë të tjerë rusë po tërhiqeshin dhe po përpiqeshin ti bashkoheshin njësive të tjera në Rusi. Ushtarët gjetën një makinë civile, një Volksvagen, që ata e grabitën.