Njësitë ruse të mbrojtjes ajrore rrëzuan 291 dronë ukrainas gjatë natës, tha të dielën Ministria Ruse e Mbrojtjes. "Sistemet e mbrojtjes ajrore rrëzuan dy bomba ajrore të drejtuara, tre predha të sistemeve të lëshimit të raketave të shumëfishta Vampire të prodhuara në Çeki dhe 291 dronë" tha ministria në kanalin e saj Telegram. Ajo shtoi se avionët luftarakë dhe dronët rusë goditën objektet e prodhimit të dronëve dhe qendrat e kontrollit brenda Ukrainës. Raportohet ndërkohë se pesë persona janë vrarë në sulmet e të shtunës në Rusi dhe Ukrainë, ndërsa të dy palët vazhdojnë të godasin njëra tjetrën. Zyrtarët ukrainas thanë të shtunën se më shumë se 200 dronë dhe pothuajse 30 raketa u lëshuan nga Rusia, dhe shumica e tyre kishin në shënjestër Dnipropetrovskun ku humbën jetën tre persona. Në Rusi, guvernatori në detyrë i Rostovit tha se dy persona humbën jetën në rajon pasi një makinë u përfshi nga flakët pas një sulmi me dron ukrainas. Sulmet erdhën ndërsa të dyja palët dhanë përditësime mbi operacionet e tyre ushtarake. Rusia pretendoi se kishte marrë dy fshatra në lindje të Ukrainës, ndërsa Presidenti ukrainas Volodymyr Zelensky tha se trupat "po i shtynin gradualisht forcat ruse jashtë" rajonit të Sumit. Ndërkohë kremlini tha të dielën se Rusia preferon mjete politike dhe diplomatike për të zgjidhur konfliktin në Ukrainë, por Kievi dhe Perëndimi janë ata që e kanë refuzuar këtë rrugë. Zëdhënësi i kremlinit, dmitri peskov, tha për agjencitë ruse të lajmeve se rruga e preferuar e rusisë është ajo përmes mjeteve politike dhe diplomatike. Por, Peskov shtoi, pa dhënë prova, se Moska vazhdon operacionin e saj ushtarak në Ukrainë sepse "të gjitha propozimet për dialog janë refuzuar, si nga Ukraina ashtu edhe nga vendet perëndimore".