Mijëra gra dolën në protesta në Turqi kundër vendimit të autoriteteve për tërheqje nga Konventa që synon mbrojtjen e femrave nga dhuna. Protestueset kërkuan nga presidenti turk, Reccep Tayip Erdogan që të kthejë mbrapsht vendimin e tij për tërheqje nga traktati. "Përmbyse vendimin, zbato traktatin!", therrisnin ato gjatë marshimit në lagjen Kadikoy, në anën aziatike të Stambollit. Jemi ngopur me shtetin patriarchal. Boll më! Boll me faktin që ndihem e pasigurtë. Jetojmë në një vend që nuk beson në barazinë mes grave dhe burrave. Mendoj se ata kanë frikë nga gratë, kanë frikë nga barazia prandaj dhe u tërhoqën. Protestuesit mbajtën portrete të grave të vrara në Turqi, me një mbishkrim: "Janë gratë ato që do të fitojnë këtë luftë". Protesta të tjera më të vogla u mbajtën në kryeqytetin Ankara dhe qytetin jugperëndimor të Izmirit, sipas raporteve të medias. Konventa e Stambollit e vitit 2011, e nënshkruar nga 45 vende dhe Bashkimi Europian, kërkon që qeveritë të miratojnë legjislacionin që ndjek penalisht dhunën në familje dhe dhunën ndaj grave. Qeveria turke shkaktoi zemërim të brendshëm dhe ndërkombëtar pasi shpalli vendimin për tërheqje. Konservatorët në partinë nacionaliste të Erdoganit dhe aleatët e tyre pretendojne se traktati dëmton unitetin e familjes.