Një shqiptar 43 vjeçar që kishte dalë me leje nga burgu në Greqi dhe nuk ishte kthyer më duke u arratisur, ka rënë sërish në prangat e policisë helene, këtë herë edhe si pjesë e një grupi narkotrafiku. Agim Margegaj është kapur në një shtëpi në Artemidë, një fshat pranë Athinës me mbi 5 kilogramë heroinë, si pjesë e një grupi që trafikonte drogë nga Shqipëria në Greqi. Shqiptari 43 vjeçar është dënuar në Greqi me burgim të përjetshëm për vrasje me dashje, tentativë vrasje më shumë se njëherë, grabitje ne bashkëpunim, armëmbajtje pa leje, përdorim arme. Ai mori leje për të dalë nga burgu disa ditë, por u arratis duke mos u kthyer më. Gjatë një operacioni ditën e hënë në mbrëmje policia greke bëri të mundur ndalimin e tij ku u kap me mbi 5 kg e 50 gramë heroine dhe një krehër fishekë. Policia ka njoftuar se është në kërkim të makinës një furgon tip Benz që dyshohet se ka bërë transportin e drogës nga Kakavija në Artemida, Athinë. Agim Margegaj është person me të kaluar kriminale edhe në vendon tonë pasi Gjykata e Lezhës e ka dënuar në mungesë me 35 vite burg për vrasje.