Ende nuk është qartësuar se çfarë çoi deri tek aksidenti në Bullgari, ku mbetën të vdekur së paku 46 persona e u lënduan shtatë të tjerë. Megjithatë, mediat bullgare flasin për tre versione se si mund të ketë ndodhur ky aksident. Sipas ekspertëve, mund të bëhet fjalë për një defekt teknik, një gabim njerëzor ose infrastrukturë të dobët. Ai me autobusin maqedonas që u shkrumbua në maqedoni, ishte aksidenti më i rëndë i regjistruar në evropë dekadën e fundit dhe autoritetet bullgare kanë nisur një hetim për të zbardhur shkaqet. Versioni zyrtar i autoriteteve bullgare, i paraqitur nga zëvendëskryeprokurori Borislav Sarafov, i cili drejton SHSK-në, është për punë në dy drejtime kryesore – gabim njerëzor ose mosfunksionim teknik. Nuk do të ketë hetim paralel në Maqedoninë e Veriut në këtë fazë dhe autoritetet lokale do të bashkëpunojnë me homologët e tyre bullgarë, raportojnë mediat bullgare. Ka komente të ndryshme se çfarë saktësisht mund të ketë shkaktuar zjarrin, si dhe kur ka ndodhur, por nuk ka asnjë informacion zyrtar për të. Prokuroria bullgare vetëm konfirmoi se ka pasur një shpërthim – arsyet e të cilit ende nuk janë sqaruar. Pikëpyetjet ndërkohë janë të shumta. Rregulloret parashikojnë qartë se sa kohë mund të drejtojë mjetin një shofer dhe kur duhet të pushojë ai. Nuk konsiderohet pushim ndërrimi me shofer, por kur automjeti është i ndalur. Është vështirë ndërkohë të merret tahografi pasi ka djegie totale të autobusit ndaj për momentin nuk dihet se sa ka udhëtuar autobusi pa ndalesa. Ndërkohë Diana Rusinova, eksperte bullgare, thotë se barriera mbrojtëse në anë të rrugës, me të cilën është përplasur autobusi, nuk ka lejuar hapjen e derës së pasme të autobusit nga ku tentuan të dalin udhëtarët ndërkohë që edhe rruga ka patur jo pak probleme.