Një anije e mbushur me emigrantë, që po tentonin të kalonin nga Serbia në Bosnje Hercegovinë është fundosur në lumin Drina gjatë natës, tha ministri i Punëve të Brendshme të Serbisë, Ivica Daçiç të enjten. “Mëngjesin e sotëm, rreth orës 05:00, policia kufitare në Llubovi u informua nga autoritetet kufitare të Bosnje Hercegovinës, por edhe nga qytetarët, që gjatë natës një anije me emigrantë është fundosur në Drina. Emigrantët po tentonin të kalonin lumin nga Serbia”, tha Daçiç, sipas njoftimit. Menjëherë pas këtij njoftimi, pjesëtarët e policisë dhe Departamenti për Situatat Emergjente shkuan në vendngjarje dhe po kryhen kontrolle në lumë, thanë autoritetet serbe. Sipas emigrantëve që dolën në breg, në anijen e fundosur thuhet se ishin 25 persona. Policia, zjarrfikësit dhe ekipet e shpëtimit gjetën 18 persona në breg, në mesin e tyre edhe tre fëmijë, tha Ministria e brendshme serbe. Autoritetet serbe thanë se në kërkime po marrin pjesë policë serbë, pjesëtarë të Departamentit për Situata Emergjente, zhytës të Xhandarmërisë së Serbisë, por edhe zyrtarë nga Bosnja. Serbia është pjesë e “rrugës ballkanike” përmes së cilët emigrantët kalojnë për të shkuar drejt Evropës perëndimore. Në dhjetë vjetët e fundit, në lumin Drina kanë humbur jetën të paktën 40 emigrantë, ndërsa kanë tentuar ta kalojnë atë. Vitin e kaluar, më shumë se 100.00 emigrantë kanë kaluar përmes Serbisë, apo 12 për qind më pak se në vitin 2022, sipas të dhënave të Komisariatit serb për Refugjatë dhe Migrim. Nga ky komisariat thanë më herët se numri i emigrantëve që kanë kaluar përmes Serbisë këtë vit është 80 për qind më i ulët sesa më 2023.