Pas situatës së krijuar në dy pikat kufitare që lidhin Kosovën me Serbinë, kryeministri i Kosovës, Albin Kurti ka vendosur të mbledhë Këshillin e Sigurisë Kombëtare. Sipas kreut të qeverisë së Kosovës, vendimet që do të ndërmerren nw lidhje me situatën e krijuar do të jenë në përputhje me rreziqet e sigurisë. “Sjellja jonë është profesionale e korrekte deri më tani”, u shpreh Kurti. Kurti bëri të ditur se është ftuar nga faktori ndërkombëtar që të shkojnë në Bruksel për të diskutuar lidhur me situatën në veri, por, sipas tij, kjo ftesë është refuzuar nga Beogradi. Të shtunën, më 25 shtator, Qendra e Regjistrimit të Automjeteve në Zubin Potok është djegur, ndërkohë që janë sulmuar edhe Qendrat e Regjistrimit Civil në Zveçan. Sipas hetimeve aty janë hedhur edhe dy granata dore, të cilat “nuk kanë shpërthyer”. Kryeministri Kurti tha se Serbia po provokon konflikt serioz. “Serbia dëshiron të militarizojë dhe të eskalojë situatën. Po sjell deri afër kufirit të Kosovës edhe helikopterë e avionë të prodhimit rus. Nëpërmjet këtyre sulmeve, Serbia provokon konflikt serioz ndërkombëtar, që rrezikon të marrë përmasa rajonale”, tha Kurti.