Top News- Tela me gjemba e flamur serb në Zveçan, KFOR rrit masat e sigurisë, vijon protesta në veri

Për të tretën ditë radhazi, në tre komunat në veri të Kosovës, Zveçan, Zubin Potok dhe Leposaviç, serbët janë mbledhur para objekteve komunale, ku tashmë paqeruajtësit e KFOR-it kanë marrë në dorë situatën. Në zvecan, KFOR ka ngritur barriera me tela me gjemba. Protestuesit serbë atje kanë shpalosur mëngjesin e të mërkurës, një flamur gjigant të serbisë. Reporterët në terren thanë se para objektit komunal janë mbledhur një numër më i madh protestuesish se një ditë më parë. Situata sidoqoftë duket e qetë dhe në mesin e protestuesve ka një numër të madh të të punësuarve në institucionet që punojnë në sistemin e Serbisë. Përfaqësues të Listës Serbe, partisë më të madhe të serbëve në Kosovë, kanë thënë se do t’i vazhdojnë protestat derisa të përmbushen kërkesat e tyre, saktësisht të tërhiqen edhe kryetarët shqiptarë të komunave, edhe njësitë speciale të Policisë së Kosovës nga veriu i Kosovës.