Të tjera armë, municione dhe pajisje ushtarake janë gjetur gjatë bastisjeve të kryera nga ana e policisë së Kosovës në veri. Ministri i Punëved të Brendshme, Xhelal Sveçla teksa ndau pamje nga aksioni, zbuloi se përveç uniformave të ushtrive të Serbisë dhe Rusisë, u gjetën dhe uniforma të ushtrive të ShBA-ve dhe asaj Britanike. Sipas Sveçlës, kjo është një dëshmi që nxjerr në pah planet dhe skenarët ogurzi për të kryer krime e sulme dhe për të fajësuar shtete të tjera. “Çdokush që tenton të cenojë rendin kushtetues, sigurinë e vendit, nuk do të mund t’i ikë ndëshkimit. Republika e Kosovës, forca e ligjit të drejtë në shtetin tonë demokratik do të ngadhënjejë.”, shkroi ministri Sveçla në Facebook. Që nga sulmi me mjete plasëse në kanalin e ujit të Ibër-Lepencit në Zubin Potok më 29 nëntor, autoritetet e Kosovës po kryejnë bastisje në pjesën veriore të shtetit, të banuar me shumicë serbe. Po ashtu, nga dhjetë të shoqëruarit në Polici, si të dyshuar për përfshirje për shpërthimin në Ibër-Lepenc, dy nga ta janë dërguar në paraburgim për një muaj. Për kryerjen e sulmit sipas policisë, u përdorën rreth 20 kg eksploziv.