Një palë tanga të mbështjella fort rreth pendës anësore të një delfini femër, e kishin prerë atë gati deri në kockë, duke ia bërë të pamundur mbijetesën. Gjitari u nxor nga deti në bregun e një plazhi të Brazilit, me të brendshmet akoma të shtrënguara fort në trup. Veterinerët kryen autopsinë dhe dolën në përfundimin që, me gjasë, tangat ishin mpleksur tek penda e delfinit që kur ai ka qenë i vogël. Ata thanë se se lëkura e delfinit ishte shëruar rreth pëlhurës, duke e lënë kafshën me një plagë përherë të hapur dhe duke ia penguar notimin dhe gjuetinë. Trupi i delfinit, i gjatë 1.4 metra dhe me peshë prej 32 kg, u zbulua nga një skuadër ambientalistësh më 16 maj, në një plazh në Itapoa. Krijesa kishte shenja dobësie kronike dhe pneumonie. Gjithashtu kishte koloni parazitësh në pjesë të veshit dhe mushkërive, si dhe shenja të rrjetave të peshkimit në fytyrë dhe rreth vrimës së frymëmarrjes. Delfinët e Guajanës jetojnë në ujëra të cekëta si dhe në grykëderdhjet përgjatë brigjeve atlantike të Amerikës Jugore dhe Qendrore. Numri i përgjithshëm i tyre nuk dihet. Femrat mund të arrijnë deri në 2.2 metra gjatësi dhe peshë deri 121 kg.