Talebanët po rrëmbejnë fëmijët e atyre që marrin pjesë në rezistencën e organizuar kundër tyre në malet dhe luginat në veri të Kabulit. Kjo është konfirmuar nga të paktën katër zyrtarë, mes të cilëve ish shefi i inteligjencës në provincën Balkh. Sipas tyre, talebanët kanë sulmuar shtëpitë duke i djegur ndërsa merrnin me vete fëmijët. Në veri të Kabulit një rezistencë e organizuar po lufton nën flamurin e “Revoltës së popullit”. Dhe është pikërisht kundër këtyre kundërshtarëve të tyre që po derdhet hakmarrja talebane. Rezistenca në malet dhe në luginat në veri të kabulit ka bërë që të mblidhet një grup luftëtarësh anti talebanë që kanë marrë kontrollin e disa distrikteve rurale. Luftime kanë shpërthyer në provincën Baghlan, rreth 120 km në veri të kabulit. Forcat anti talebane kanë marrë kontrollin e tre rajoneve përreth luginës andarab, afër Panshirit, e vetmja provincë që është ende e paarritshme nga talebanët. Detajet mbi luftimet mbeten të pasigurta por bëhet fjalë për rezistencën e parë të organizuar kundër talebanëve që nga blitz-i i tyre në vend që në më pak se një javë u lejoi marrjen e kontrollit të pjesës më të madhe të vendit përfshirë kryeqytetin Kabul.