Presidenti rumun Nicusor Dan e cilësoi një komplot të supozuar rus për sabotazh, të ndodhur muajin e kaluar, si një "shkelje të rëndë" të sovranitetit dhe sigurisë së një vendi anëtar të NATO-s, në një kohë kur shumëkush druhet se lufta e Moskës në Ukrainën fqinje rrezikon të përhapet përtej kufijve të saj. Deklaratat e Dan erdhën një ditë pasi Shërbimi i Inteligjencës Rumune njoftoi se kishte identifikuar një "rrjet sabotimi" të koordinuar nga Rusia, pas zjarrit që ra më 14 shtator në qarkun qendror të Brasovit. Sipas autoriteteve, zjarri dëmtoi ambientet e disa subjekteve tregtare. Pamjet video të publikuara nga shërbimi i inteligjencës shfaqin një person duke u ngjitur në shkallët e jashtme të një ndërtese, të ndjekur nga shkëndija dhe flakë që përfshijnë ndërtesën. Më pas, shihen dy persona duke u larguar nga vendngjarja me biçikleta. "E dënoj, në mënyrën më të ashpër të mundshme, çdo përfshirje të Federatës Ruse në akte sabotimi në territorin rumun," shkroi Dan në një postim në Facebook. "Veprime të tilla janë të papranueshme dhe përbëjnë një shkelje të rëndë të sovranitetit dhe sigurisë së vendit tonë."