Takimi i planifikuar për t’u mbajtur në Uashington në 2 shtator mes delegacioneve të Kosoves dhe Serbisë është shtyrë për dy ditë. Zëri i Amerikës konfimon lajmin për shtyrjen me dy ditë të takimit të paralajmëruar që do mbahej në Shtëpinë e Bardhë. Takimi i shumëpërfolur do të organizohet nën mbikqyrjen e Këshilltarit për Siguri Kombëtare në SHBA, Robert O’Brien, dhe ambasadori Richard Grenell, i dërguar i posaçëm i presidenti Donald Trump për bisedimet e paqes Kosovë - Serbi. Më herët presidenti serb Sleksander Vuçiç gjatë nje deklarate për mediat paralajmëroi se mund të kishte shtyrje të takimit në fjalë me dy ditë. Zyra e zotit O'Brien tha më herët se Shtetet e Bashkuara presin me padurim për këto diskutime të rëndësishme me presidentin Aleksandër Vuçiç dhe kryeministrin Avdullah Hoti dhe besojnë që përparimi ekonomik është thelbësor për çuarjen përpara të procesit të paqes. Në Kosovë udhëheqësit e institucioneve e kanë mirëpritur angazhimin amerikan për mbajtjen e takimit në Shtëpinë e Bardhë. Kryeministri Avdullah Hoti shkroi më herët se në takim do të diskutohet "për projekte madhore të bashkëpunimit ekonomik që do ta ndërrojnë perspektiven ekonomike të Kosovës dhe rajonit". Deklarata e Hotit u mirëprit edhe në Beograd, ku presidenti Vuçiç, tha se fakti që do të bisedohet për çështje ekonomike është gjë e mirë për Serbinë dhe rajonin. Megjithatë, ai tha të premten se temat e diskutimit shtrohen nga mikpritësit dhe nuk e përjashton mundësinë që përveç çështjeve ekonomike të diskutohet edhe për ato politike. Ai ritheksoi se nuk mund të ketë bisedime për njohjen e pavarësisë së Kosovës.