Një polic në shërbim prej shumë vitesh, humbi jetën pasi një shofer përplasi makinën e tij mbi oficerët në një barrikadë sigurie pranë godinës së Kongresit. Incidenti ndodhi pak pas mesditës. Makina, një sedan blu, u përplas mbi barrierën duke plagosur dy policë. Shoferi që ngiste makinën kishte një thikë me vete dhe u qëllua nga dy oficerët në vendngjarje. Si i dyshuari ashtu edhe dy policët u dërguan në spital, dhe atje, njëri nga oficerët dhe i dyshuari, humbën jetën. Oficeri quhej Uilliam Evans dhe humbi jetën si pasojë e plagëve të marra në përplasje. Zyrtarët konfirmuan lajmin e vdekjes së oficerit, i cili kishte 18 vite që shërbente në policinë e kongresit. Zyrtarët e policisë thanë se agresori nuk ishte i njohur për policinë dhe se incidenti nuk mendohej si i lidhur me terrorizmin. Presidenti joe Biden sapo ishte larguar nga shtëpia e bardhë, në drejtim të Camp David, kur ndodhi incidenti. Ai dhe bashkëshortja e tij lëshuan një deklaratë, ku shprehën keqardhjen për rastin dhe ngushëlluan familjen e Evans. Flamuri në shtëpinë e bardhë ndërkohë u ul në gjysmë shtizë. Incidenti ndodh rreth tre muaj pas sulmit të 6 janarit në kongres, nga mbështetës të ish presidentit Trump. Policia tha se nuk kishte një lidhje mes incidentit dhe trazirave në kongres që cuan në vdekjen e pesë personave. Tani hetuesit po rrëmojnë në të shkuarën e agresorit, 25 vjecatrit Noah Green, për të mësuar më shumë për motivet që e shtynë të ndërmerrte sulmin. Green e përshkruante veten si një ndjekës të islamit por zyrtarët nuk kanë bërë një lidhje as me motive terrorizmi për momentin.