Organizata e Kombeve të Bashkuara përcaktoi tetë drejtime ku qeveria shqiptare duhet të punojë për të gjeneruar fondet e nevojshme për rritjen e pensioneve dhe asistencës sociale. Në harkun kohor të dy viteve të fundit është krijuar një hendek në skemën e pensioneve për shkak të brezit që punoi gjatë periudhës së tranzicionit kryesisht me paga të ulëta apo edhe në informalitet. Kjo situatë po sjell varfëri në moshën e tretë, në një preiudhë kur inflacioni për muajin mars shënon 5.3 për qind. Në një studim për Shqipërinë OKB ka evidentuar disa hapësira fiskale të cilat mund të shfrytëzohen pët të gjeneruar fonde dhe për t’i shpërndarë ato në drejtim të rritjes së pensioneve. Zgjerimi i mbulimit të sigurimeve shoqërore dhe të ardhurave nga kontributet; Rritja e të ardhurave tatimore; Eliminimi i flukseve të paligjshme financiare; Rishpërndarja e shpenzimeve publike; Përdorimi i rezervave valutore fiskale që administrohen nga Banka Qendrore; Menaxhimi i borxhit: huamarrja ose ristrukturimi i borxhit sovran; Rritja e ndihmave dhe transfertave dhe Miratimi i një kuadri makroekonomik më akomodues janë disa nga metodat që mund të ndiqen dhe të çojnë në rritjen e pensioneve dhe ndihmës sociale. Decentralizimi fiskal dhe administrativ i Shqipërisë që filloi në vitin 2015 bëri që një pjesë e madhe e administrimit dhe financimit të ndihmës sociale dhe shërbimeve sociale të transferoheshin nga pushteti qëndror tek pushteti vendor. Të ardhurat e pushtetin vendor shfaqën një trend rritës, gjithashtu edhe të ardhurat e arkëtuara nga taksat dhe tatimet u rritën për shkak të inflacionit çka krijon një mjedis komod ekonomik për rritjen e pensioneve.