Autoritati Rregullativ i ka autorizuar kompaninë amerikane Starlink për ofrimin shërbimit të internetit në të gjithë territorin e Kosovës. Në njoftimin që shoqëron vendimin, ARKEP thotë se shërbimi i internetit satelitor që ofron kompania e Elon Musk do të rrisë cilësinë, konkurrencën dhe është një garanci shtesë për të ruajtur komunikimin dhe infrastrukturën kritike të vendit në raste fatkeqësisht dhe emergjencash kombëtare. Starlink është rrjet privat satelitor i internetit që zotërohet prej kompanisë SpaceX të miliarderit Elon Musk. Kompania ka gati 5 mijë satelitë në orbitë dhe ofron internet në gati 100 vende të botës. Më herët, Starlink ka nisur të ofrojë shërbimin e internetit satelitor edhe në Shqipëri dhe në Maqedoninë e Veriut, ndërsa kompania ka njoftuar se brenda këtij viti do të ofrojë shërbimin edhe në Serbi. Megjithatë, prej vitit 2023, autoritetet serbe mbajnë pezull licencën nën dyshimet se Starlink mund të keqpërdorë të dhënat e qytetarëve serbë.