Tre shqiptarët thuhet të qëndrojnë pas skemës së mashtrimit që vuri në lëvizje policinë e Torinos në Itali, përmes së cilës sistemit shëndetësor vendas i është bërë një dëm prej më shumë se 1 milionë euro. lajmin e përcjell gazeta “La Repubblica”, sipas të cilës përmes manipulimeve kanë marrë shërbim shëndetësor falas të paktën 150 shqiptarë, kryesisht të diagnostikuar me kancer. Të gjithë personat e përfshirë janë tani nën hetim. Shtypi vendas shkruan se shumë prej shqiptarëve të sëmurë kishin hyrë në Itali me qëlim të vetëm kurimin. Verifikimet e deritanishme tregojnë se tre personat që krijuan skemën, dy shqiptare që punonin si ndërmjetësuese kulturore në qendra e Informacionit mbi Shëndetin e Emigranëve në Torino dhe djali i njërës prej tyre, po përballen tashmë me pasojat. Një shtetase është në arrest shtëpie, tjetra me detyrim paraqitjeje, ndërsa djali është pushuar nga puna. Te tre ata kishin shfrytëzuar rregullin e Nenit 35 të aktit të imigracionit i cili lejon qytetarët që nuk janë në gjendje të mirë shëndetësore të marrin kujdes shëndetësor në rast pamundësie ekonomike. Nëse i sëmuri i përmbush kriteret, atij i caktohet një kod identifikimi dhe mund të përfitojë trajtim në objektet publike. Duke shfrytëzuar këtë rregull, dy gratë i këshillonin shqiptarët të shkonin në Itali për t’u kuruar me një datë të rreme hyrjeje në vend, prej më shumë se tre muajsh si të parregullt. Ata duhet gjithashtu t`i raportonin si të humbura mjetet në mënyrë që data e saktë të mos verifikohej dot dhe përmes një deklarimi të rremë të situatës ekonomike, realizohej futja e tyre në sistem.