Burime ushtarake të Irakut njoftuan se kanë rrëzuar dy dronë, të cilët po fluturonin mbi një bazë ajrore, ku janë të vendosura forcat amerikane. Ky rast ndodhi vetëm një muaj pasi e njëjta bazë ishte shënjestër e një sulmi nga një dron. Sistemi i mbrojtjes së ushtrisë amerikane, C-RAM u aktivizua dhe qëlloi dronët, që po fluturonin më 6 qershor, mbi bazën Ain al-Assad rreth orës 12:30 sipas kohës lokale, tha ushtria irakiane. Më 8 maj, ndodhi një sulm me dron mbi këtë bazë ajrore, që gjendet në provincën Anbar. Por nga ky sulm nuk pati të plagosur. Ndërkaq, zëdhënësi i koalicionit ushtarak në Irak që udhëhiqet nga SHBA-ja, tha se disa orë para rrëzimit të dronëve ishte rrëzuar edhe një raketë mbi aeroportin e Bagdadit dhe në këtë rast “nuk u shkaktuan as dëme në njerëz dhe as dëme materiale”. Ende askush nuk e ka marrë përgjegjësinë për sulmet. Por, zyrtarët amerikanë kanë fajësuar milicitë e mbështetura nga Irani, që vazhdimisht sulmojnë interesat amerikane në Irak, përfshirë trupat, Ambasadën në Bagdad apo karvanet irakiane, që bartin furnizime për forcat e huaja. Në muajin mars, një bazë në perëndim të Irakut ku janë të vendosura trupat e koalicionit që udhëhiqet nga SHBA-ja dhe kontraktorët, u godit me dhjetë raketa. Në këtë sulm, u vra një kontraktor. Grupet paramilitare, të lidhura me Iranin kanë kërkuar nga të gjitha trupat e huaja, përfshirë 2.500 trupat amerikane, që të largohen nga Iraku, duke thënë se prezenca e tyre në këtë shtet konsiderohet pushtim. Koalicioni i udhëhequr nga SHBA-ja, misioni i të cilit është të luftojë militantët e Shtetit Islamik, vazhdon të jetë i vendosur në Irak. Gjithashtu vazhdon punwn edhe misioni i udhëhequr nga NATO-ja, që trajnon forcat e sigurisë irakiane.