Përveç dënimit me dy vite burg, Gjykata Kundër Korrupsionit dhe Krimit të Organizuar ka vendosur edhe nën sekuestro një sërë pasurish të ish-kryeprokurorit Adriatik Llalla. Pjesa më e madhe e tyre janë tokë arë që ndodhen pak kilometra në veri-lindje të Tiranës. Bëhet fjalë për rreth 22 hektarë tokë arë të ndarë në tre parcela në fshatin Qehaj-Shytaj, paratë për të cilën, sipas llogaritjes së gjykatës, ish-kryeprokurori nuk i justifikon me burime të ligjshme, ndaj nën dyshimet se kjo pasuri është produkt i veprave penale të korrupsionit vendosi sekuestrimin. Por, si u mbrojt Adriatik Llalla përballe gjykatës? Llalla i tregoi trupit gjykues në fund të muajit prill dëshminë e shtetasit Gazmen Brahimi, që ka pranuar se ja ka shitur me çmim dukshëm nën çmimin e tregut këtë pronë për shkak se i duheshin paratë. Tokat, sipas avokatit mbrojtës të Llallës, Gazmen Brahimi i ka blerë me çmime të ndryshme që variojnë nga 2 mijë lek të vjetra deri në 10 mijë lek të vjetra metri/katrorë. Tokën e parë që ia ka blerë shtetasit Ibrahim Shima e ka marrë me qëllimin për të ndërtuar shtëpi për familjen e tij dhe pjesët e tjera të tokës i ka blerë ngjitur me tokën e Ibrahimit për t’i përdorur për kopështari për të kullotur kuajt dhe për bazë ushqimore. Prona tjetër e sekuestruar është një apartament me sipërfaqe 67 metra/katrorë në qytetin e Durrësit. Adriatik Llalla e ka blerë këtë apartament për vetëm 2.2 mln lek më 19 mars të vitit 2012 dhe vetëm dy muaj më vonë, kjo pasuri është rivlerësuar me një vlerë më shumë se dyfish në rreth 5 mln lek. Llalla thotë në mbrojtjen e tij se rivlerësimi është kryer nga një ekspert privat dhe mbi bazën e aplikimit nga ana e vetë ish-kryeprokurorit 17 ditë pas blerjes së këtij apartamenti. Por, prokuroria hodhi dyshime se pas kësaj skeme të fryrjes së çmimit të pronës qëndronte përpjekja e ish-kryeprokurorit për të mos deklaruar të ardhurat e tij. Në dosjen voluminoze të mbrojtjes thuhet gjithashtu se shpenzimet e spitalit të bashkëshortes së Llallës në Shtetet e Bashkuara të Amerikës janë mbuluar në një masë të madhe nga një mik i familjes, shtetas amerikan. Në fund, mbrojtja e cilëson procesin gjyqësor të stisur, të parregullt ligjërisht dhe të nxitur politikisht duke kërkuar pafajësinë e Llallës. Kërkesa është refuzuar nga shkalla e parë e gjykatës së posaçme, ndërkohë që ish-kryeprokurori ka 15 ditë kohë për apelimin e këtij vendimi.