Emigrimi i shqiptarëve drejt vendeve të BE-së, kryesisht drejt Gjermanisë, Italisë, Greqisë e Francës po kap shifra rekord, megjithatë integrimi i tyre në vendet europiane mbetet në nivele të ulëta. Në vitin 2021, shtetasit shqiptarë të regjistruar në Gjermani ishin gati 77 mijë persona, ndërsa në Francë 33 mijë persona, gati trefish më shumë krahasuar me vitin 2015. Sipas Eurostat duke filluar nga viti 2008, 756 mijë shtetas shqiptarë janë pajisur me leje qëndrimi në vendet e Bashkimit Europian. Pas Italisë dhe Greqisë, që historikisht kanë qenë destinacioni i emigrantëve shqiptarë, lista e shteteve me numrin më të lartë të emigrantëve pasohet nga Gjermania, Franca, Belgjika, Zvicra dhe Suedia.