Agresioni i paprovokuar rus dhe konfikti mes Rusisë e Ukrainës vijon të jetë biseda kryesore në tryezën e liderve të mëdhenj botërorë, dhe jo vetëm. Këtë të mërkurë në selinë e NATOS në Bruksel, u zhvillua takimi i jashtëzakonshëm i ministrave të Mbrojtjes së NATO-s, ku fokusi i bisedimeve u përqëndrua tek cështja Rusi-Ukrainë. Ministri shqiptar i Mbrojtjes, Niko Peleshi gjatë fjalës së tij në këtë takim, vuri theksin edhe njëherë tek pozicioni i Shqipërisë, duke thënë se mbështet plotësisht integritetin territorial dhe sovranitetin e Ukrainës si dhe dënon rëndë shkeljen e ligjit ndërkombëtar nga ana e Rusisë. Peleshi tha se vendi ynë iu bashkua pa asnjë hezitim vendeve të tjera të NATO-s dhe BE-së, për të vendosur sanksione kundër Rusisë, si dhe për gatishmërinë e plotë për të ofruar ndihmë për Ukrainën. Më tej, ministri i mbrotjes, kërkoi nga Aleanca vëmendje të shtuar dhe analizë të kujdesshme për rajonin e Ballkanit, edhe pse fokusi kryesor mbetet situata në Ukrainë. Ai tha se konflikti duhet kontrolluar dhe mbajtur jashtë kufijve të NATO-s, pasi ndikimi rus në Ballkan konsiderohet rrezik real për rajonin.