Shpronësimet për interes publik, janë shoqëruar shpesh me moskompesimin e qytetarëve apo zvarritjen e procesit të dhënies së dëmshpërbilimit. Avokati i Popullit në raportin më të fundit ngre kambanën e alarmit për procesin e shpronësimit të qytetarëve. ‘Theksojmë se, shpronësimi për interes publik i pronës private, përbën një kufizim sensitiv/delikat në të drejtën kushtetuese. Këto kufizime duhet të trajtohen me kujdesin e duhur dhe të jetë në vëmendjen e institucioneve shtetërore, në mënyrë që të mos perceptohen arbitrare nga individët’ – shkruhet në raport. Koncepti i shpronësimit dhe shpërblimit të pronës nuk përfshihet vetëm për pasuritë e regjistruara por edhe për ato që i janë nënshtruar një procesi të ligjshëm, sikurse pasuritë në proces legalizimi. Avokati i Popullit ka konstatuar se për pasuritë në proçes legalizimi nuk janë marrë masa shpërblim, madje as në rastet kur ka kaluar parcela ndërtimore në pronësi kundrejt çmimit dhe lidhjes së kontratës, nuk janë marrë masa për shpronësimin e truallit. Ky veprim i organeve të administrates shtetërore justifikohet me faktin se nuk kanë konfirmim për regjistrimin e truallit. Një fakt i tillë konstatohet psh. në rastin e shembjes së disa objekteve, me qëllim zbatimin e projektit “Bulevardi Verior dhe Rehabilitimi i Lumit të Tiranës”. Kjo analizë dhe ky justifikim nuk është aspak ligjor dhe cënon drejtpërdrejt të drejtat pronësore të qytetarëve. Edhe Gjykata e Strasburgut në disa vendime të saj me fokus problematikat e procesit të kompesimit, ka bërë të qartë se, e drejta për strehim përfshin edhe rastin e godinave të ndërtuara në mënyrë të paligjshme ose që ju mungon dokumenti i pronësisë.