Prokurorët në Shtetet e Bashkuara kanë kërkuar që vrasësi i George Floyd të dënohet me 30 vjet burgim. Në muajin prill ish-oficeri i policisë, Derek Chauvin, u shpall fajtor për vrasjen. Kohëzgjatja e dënimit pritet të shpallet me 25 qershor. Të mërkurën prokuroria tha se vrasja kishte "tronditur ndërgjegjen e kombit". Por, mbrojtja e përshkroi vrasjen si "një gabim" të bazuar në trajnimin e Derek Chauvin. Floyd, 46-vjeçar, afrikano-amerikan, është vrarë nga oficeri i bardhë i policisë, i cili e shtypi me gjithë peshën e trupit duke i mbajtur gjurin në qafë për më shumë se nëntë minuta gjatë procedurës së arrestimit. Ngjarja ka ndodhur në muajin maj të vitit 2020. Vdekja e tij ka nxitur protesta kundër racizmit dhe dhunës policore në një mori qytetesh në Shtetet e Bashkuara dhe më gjerë, si dhe ka shtyrë përpara përpjekjet për reforma policore në nivel kombëtar. Chauvin dhe tre ish-oficerë të tjerë akuzohen veçmas për shkeljen e të drejtave civile të George Floyd.