Shtetet e Bashkuara kanë paralajmëruar se do të rishqyrtojnë rolin e tyre në Bosnje e Hercegovinë si pasojë e pavendosmërisë evropiane dhe dështimit të Këshillit për Zbatimin e Paqes në Bosnje për t’i përmbushur përgjegjësitë e veta, pasi ata nuk arritën ta emëronin një përfaqësues të ri ndërkombëtar, tha Ambasada amerikane në Sarajevë. Ajo shtoi s SHBA-ja është e “zhgënjyer” nga dështimi i vendeve evropiane për të arritur pajtueshmëri gjatë mbledhjes së PIC-it për të zgjedhur përfaqësuesin e ri të lartë në Bosnje. Ambasada sqaroi se delegacioni amerikan "u përpoq të arrinte një pajtueshmëri rreth një vizioni të përbashkët dhe kandidatit shumë të kualifikuar të Italisë. Pavarësisht pritjeve që Bosnja ta kishte në fillim të qershorit përfaqësuesin e nëntë të lartë, kjo nuk ndodhi. Në vend të një marrëveshjeje, u paralajmërua se për përfaqësuesin e ardhshëm të lartë do të diskutohet sërish në fund të qershorit.