SHBA dhe Izraeli kanë simuluar sulme të reja ndaj Iranit, duke fluturuar pranë kufijve të Teheranit. Ushtria izraelite angazhoi dhjetëra avionë luftarakë në një stërvitje, të hënën, trajektorja e së cilës përputhej me atë të një sulmi të mundshëm. Avionët fluturuan më shumë se 1300 km larg nga Izraeli, duke kaluar përmes hapësirës ajrore siriane dhe irakiane, dhe u kthyen mbrapsht në kufirin me Iranin, thanë zyrtarë për "Axios". Zyrtarët bënë të ditur se Izraeli dhe Uashingtoni kanë hartuar plane specifike për një valë të re sulmesh pas zgjedhjeve të mesit të mandatit në SHBA në muajin nëntor. Qëllimi është rrëzimi përfundimtar i regjimit të Teheranit, pas një serie sulmesh të përbashkëta që çuan në shpërthimin e luftës në Lindjen e Mesme në muajin shkurt. Sipas "The Neë York Times", operacioni planifikohet të jetë i shkurtër, por intensiv, dhe do të ketë në shënjestër infrastrukturën energjetike, bërthamore dhe atë të raketave. Zyrtarët besojnë se një tjetër sulm i fuqishëm do ta çojë ekonominë e Teheranit drejt kolapsit, duke e detyruar atë të bëjë lëshime për t'i dhënë fund konfliktit. Benjamin Netanyahu bëri thirrje për sulme më herët gjatë tetorit, por misioni nuk u realizua për shkak të hezitimit të Donald Trump-it për ta ndezur sërish konfliktin para zgjedhjeve.