Sekretari amerikan i Mbrojtjes, Pete Hegseth, ka deklaruar se Uashingtoni është i gatshëm të rifillojë veprimet ushtarake kundër Iranit nëse negociatat nuk prodhojnë një marrëveshje. Ai tha se forcat amerikane janë në gatishmëri pavarësisht përpjekjeve për të arritur një zgjidhje diplomatike. Duke folur në forumin e mbrojtjes dhe sigurisë Shangri-La Dialogue në Singapor, Hegseth tha se Shtetet e Bashkuara janë “më se të afta” për të rinisur sulmet nëse kjo bëhet e nevojshme dhe se rezervat e tyre ushtarake janë “më se të përshtatshme” për operacione të tilla. Shefi i Pentagonit tha se Trump po tregon “durim” dhe se ai “do të pranojë vetëm një marrëveshje të mirë” për të parandaluar Iranin të sigurojë armë bërthamore. Aktualisht, Irani posedon mbi 440 kilogramë uranium të pasuruar në 60 për qind, sipas Agjencisë Ndërkombëtare për Energjinë Bërthamore - një nivel shumë përtej nevojave civile dhe vetëm një hap teknik larg nivelit për armë bërthamore. Por Teherani ka mohuar që do ta përdor për armë bërthamore.