Departamentet e shëndetit publik në mbarë Shtetet e Bashkuara po i bëjnë thirrje Qendrës për Kontrollin dhe Parandalimin e Sëmundjeve (CDC) të tërheqin ndryshimet që agjencia federale u bëri së fundmi udhëzimeve për testimin për koronavirusin. Koalicioni Shëndetësor për Qytetet e Mëdha dhe Shoqata Kombëtare e Zyrtarëve të Shëndetësisë të Qyteteve dhe Distrikteve që përfaqësojnë mijëra departamente lokale, u dërguan një letër krerëve të CDC-së dhe Departamentit për Shërbimet e Shëndetësisë, duke kërkuar që këto agjenci “të tërhiqnin” këshillat e rishikuara për testimin e virusit. VOA thotë se organizatat u bënë gjithashtu thirrje atyre që të rifusnin në fuqi rekomandimet sipas së cilave, njerëzit që kanë pasur ekspozim ndaj virusit, të testohen edhe nëse nuk kanë simptoma. Në letrën e tyre, grupet shëndetësore thonë se vendimi i CDC-së për të tërhequr udhëzimet këtë javë “kushton jetë dhe mjete jetese” dhe se “të dhënat e vetë CDC-së sugjerojnë që ndoshta deri në 40 për qind të rasteve me COVID u atribuohen transmetimeve asimptomatike”. Kreu I CDC-sw Robert Redfield iu përgjigj kritikave lidhur me udhëzimet e rishikuara duke thënë se “testimi mund të konsiderohet për të gjitha kontaktet e afërta të pacientëve të konfirmuar ose të mundshëm”. Presidenti Donald Trump njoftoi të enjten se Shtetet e Bashkuara do të kenë një vaksinë për koronavirusin “para fundit të vitit ose edhe më herët”.Në Shtetet e Bashkuara ka të paktën 5.8 milionë raste me COVID-19, shifra më e lartë në botë dhe gati 186 mijë vdekje.