Një grup prej gati 50 mijë fëmijësh palestinezë në gjendje kritike dhe të plagosur do të evakuohen nga Gaza në Mbretërinë e Bashkuar për trajtim mjekësor në javët e ardhshme. Lajmin e përcjell BBC, që sqaron se këta do të jenë fëmijët e parë që do të dërgohen në Mbretërinë e Bashkuar për trajtim si pjesë e një operacioni qeveritar që koordinohet nga Ministria e Jashtme, Ministria e Brendshme dhe Departamenti i Shëndetësisë. Fëmijët do të zgjidhen nga Organizata Botërore e Shëndetësisë dhe do të udhëtojnë me anëtarët e familjes përmes një vendi të tretë, ku do të mblidhen të dhëna biometrike, pohon media e njohur. Kjo lëvizje vjen në vazhdën e një letre që disa ligjvënës britanikë i dërguan qeverisë duke i kërkuar “të sjellë pa vonesa në Mbretërinë e Bashkuar fëmijët e sëmurë dhe të plagosur nga Gaza”. Grupi ndërpartiak prej 96 deputetësh paralajmëroi se fëmijët ishin në rrezik vdekjeje të menjëhershme për shkak të “shkatërrimit” të sistemit të kujdesit shëndetësor në Gaza dhe çdo pengesë për evakuim duhet të hiqet menjëherë, shkruan BBC. Bëhet e ditur se disa fëmijë nga Gaza tashmë janë dërguar privatisht në Mbretërinë e Bashkuar për trajtim mjekësor përmes një iniciative nga organizata Project Pure Hope (PPH), por qeveria deri më tani nuk ka evakuuar asnjë përmes skemës së saj gjatë konfliktit. Nisur nga kushtet e skajshme aktuale në territory, ka shumë gjasë që një pjesë e këtyre të miturve, pas fundit të trajtimit të mos kthehen më në enklavë, por të hyjnë në sistemin britanik të azilit. Raportohet se më shumë se 50,000 fëmijë janë vrarë ose plagosur që kur filloi lufta në Gaza në tetor 2023, sipas organizatës bamirëse të OKB-së UNICEF.