Akademia Rajonale për Zhvillimin e Demokracisë (ADD) ka akuzuar Serbinë për ndërhyrje në zgjedhjet lokale në Malin e Zi, Podgoricë e Kotorr, duke thënë se aktivistë të Partisë Progresive Serbe (SNS) u panë atje me xhip, si dhe autobusë me votues me të drejtë votimi të dyfishtë nga Serbia. “Përveç votuesve të paligjshëm nga Serbia, aktivistët e SNS-së së Vuçiçit para dhe gjatë ditës së zgjedhjeve ushtronin presion mbi votuesit në Podgoricë dhe Kotorr. Ky akt paraqet ndërhyrje direkte në procesin zgjedhor në Mal të Zi dhe vazhdimësi e politikës agresive të Vuçiçit ndaj fqinjëve”, shkruhet në deklaratë. Akademia bën me dije se në ditën e zgjedhjeve të dielën, 14,000 qytetarë më shumë kanë hyrë në Mal të Zi nga Serbia sesa në të njëjtën ditë të vitit të kaluar. Sipas ADD, kjo është një "shkelje e sovranitetit të Malit të Zi dhe një rrezik serioz për stabilitetin rajonal". Teksa e quajnë Vuçiç si ‘ish-ministri i propagandës i Sllobodan Millosheviçit’, në deklaratë shkruhet më tej se parregullsitë zgjedhore nga regjimi serb rrezikojnë paqen civile në Mal të Zi. ADD i bëri thirrje BE-së që "të monitorojnë nga afër situatën e paqëndrueshme në Mal të Zi" dhe të reagojnë ndaj shkeljeve serioze të paqes, sigurisë dhe parimeve demokratike.