Gjykata e Tiranës ka miratuar kërkesën e prokurorisë për vendosjen nën masën e sekuestros të pesë pasurive të paluajtshme në pronësi të një shtetasi shqiptar që ndodhet nën hetim për prodhim dhe shitje droge në Gjermani. Sekuestro është vendosur ndaj 850 metrave tokë arë të ndodhura në Zall Herr të Tiranës, një apartamenti me sipërfaqe 114 metra katrorë, një biznesi me sipërfaqe 100 metra katrorë dhe dy posteve parkimi, të ndodhura po në Tiranë. Pasuritë janë në pronësi të shtetasit Ilber Domi, i shpallur në kërkim ndërkombëtar nga Interpoli gjerman me akuzat e trafikut të drogës dhe armëmbajtjes pa leje. Prokurorira thotë se ka vërtetuar që as ky shtetas dhe as familjarët e tij nuk justifikojnë të ardhurat e siguruara nga viti 2011 deri në 2024 për të blerë pasuritë e mësipërme, duke ngritur dyshimin e arsyeshëm se ato janë produkt i aktivitetit të shitjes së lëndëve narkotike në Gjermani.