Vendimi për rritjen me 15 për qind të çmimit të energjisë elektrike në Kosovë mund të shkaktojë një efekt domino dhe rritje zinxhir çmimesh të mallrave dhe të shërbimeve. Bizneset, sidomos ato prodhuese, paralajmërojnë se rritja e çmimit të energjisë do t’u shtrenjtojë kostot e prodhimit duke i detyruar që të rrisin çmimet për klientët e tyre. Rritja e çmimeve, paralajmërojnë ekspertët, do të rrisë çmimet e bukës, qumështit, vajit, pijeve dhe shërbimeve. Aktualisht, për konsumatorët që shpenzojnë deri në 800 kilovatë në orë brenda një muaji, çmimi i energjisë elektrike gjatë ditës është 7.79 centë për kilovat. Në rast të shtrenjtimit për 15%, ata do të paguanin 8.96 centë. Vendimi u mor nga Zyra e Rregullatorit të Energjisë, që shqyrton dhe cakton çdo vit tarifat e reja për këtë produkt. Sipas këtij institucioni, rritja e tarifave këtë vit është e domosdoshme, për shkak të uljes së prodhimit të energjisë prej amortizimit të TEC-eve, rritjes së konsumit dhe varësisë së madhe nga importet me çmime të larta.