Republika Çeke "ndoshta" nuk do të mundë të arrijë objektivin e NATO-s për të rritur shpenzimet ushtarake në 2% të produktit të brendshëm bruto këtë vit, tha kryeministri Andrej Babis në një intervistë të botuar të dielën. "Ne do të bëjmë çmos" për të përmbushur premtimin, tha Babis për Financial Times, por ai edhe shtoi se qeveria e tij po përballet me një deficit buxhetor për shkak të shpenzimeve të tepërta nga paraardhësi i tij pro BE-së. Presidenti çek Petr Pavel ka kundërshtuar qeverinë populiste të Babis për planet e saj për të zvogëluar shpenzimet e mbrojtjes në buxhetin e vitit 2026. Edhe pse e nënshkroi buxhetin duke e kthyer në ligj, Pavel paralajmëroi në mars se shpenzimet ushtarake nuk korrespondonin me kërcënimet në rritje të sigurisë dhe angazhimet e shpenzimeve të NATO-s. Babis i tha Financial Times se Praga ishte e angazhuar për të përmbushur objektivin e ri të NATO-s prej 3.5% të Produktit të Brendshëm bruto deri në vitin 2035, por aleatët e NATO-s duhet të përqendrohen më shumë në përmirësimin e aftësive sesa në objektivat e shpenzimeve, të cilat mund të manipulohen lehtësisht. SHBA planifikon t'i tregojë NATO-s se do të zvogëlojë kapacitetet ushtarake amerikane në dispozicion për të ndihmuar vendet evropiane të aleancës, në një rast krize të madhe, raportoi Reuters këtë muaj. Presidenti Donald Trump ka kohë që u ka bërë presion aleatëve që të shpenzojnë më shumë për mbrojtjen e tyre. Shefi i Pentagonit, Pete Hegseth, tha të shtunën se: "Epoka kur Shtetet e Bashkuara subvenciononin mbrojtjen e vendeve të pasura ka mbaruar. Ne kemi nevojë për partnerë, jo për protektorate", deklaroi ai.