Italia ka regjistruar 10010 infektime të reja në 24 orë dhe kjo është shifra më e lartë ditore që nga fillimi i pandemisë në vend, 13 për qind më e lartë edhe se rekordi i një dite më parë, 8804 raste të reja. Zyrtarët raportuan edhe 55 viktima të reja nga covidi, më pak se 83 viktimat e një dite më parë, dhe shumë më pak krahasuar me kulmin e pandemisë në vend në mars dhe prill, kur një rekord prej 900 viktimash në ditë u arrit. Numri i të shtruarve në kujdes intensiv është rritur po ashtu në mënyrë të qëndrueshme. Ai ishte 638 të premten, 586 të enjten ndërkohë që në gjysmën e dytë të korrikut numëroheshin në këto reparte rreth 40 pacientë me covid. Si pasojë e rritjes së infektimeve, rajoni i Campanias në vend ka vendosur që ta kalojë mësimin online për dy javë. Franca regjistroi një rekord të ri për sa i takon rasteve të koronavirusit me 30621 infektime në 24 orë e kjo vjen ndërsa parisi dhe nëntë qytete të tjera të vendit janë vendosur tani në ndalim qarkullimi gjatë natës. Edhe gjermania theu rekordin e infektimeve me koronavirusin e ri për të dytën ditë radhazi të premten. Autoritetet raportuan 7334 raste të reja të premten, rreth 700 më shumë se 6638 që u raportuan të enjten. Viktimat e reja ndërkohë ishin 24 duke e cuar totalin e tyre në 9734 që nga fillimi i pandemisë. Edhe numri i pacientëve me koronavirus në kujdes intensiv është në rritje.