Pavarësisht frikës për variantin Omicron të koronavirusit, që rritet nga ora në orë dhe pavarësisht faktit se gjithnjë e më shumë vende evropiane po rikthehen tek masat dhe kufizimet, të dielën në zvicër votohet për pasaportën e gjelbër. Elektorati zviceran në fakt është thirrur në kutitë e votimit që të deklarohet për një seri modifikimesh në ligjin për covidin, përfshirë bazën ligjore për certifikatën shëndetësore. Bëhet fjalë për vendin e parë në botë që voton për pasaportën e gjelbër por nuk është hera e parë që zviceranët votojnë në një referendum për masat sanitare të marra për të luftuar pandeminë. Më 13 qershor, ligji për koronavirusin iu nënshtrua votës popullore dhe atëherë, ai u pranua me më shumë se 60 për qind të votave. Me më pak se dy të tretat e popullatës së vaksinuar plotësisht, zviceranët kanë një nga shkallët më të ulëta të imunizimit në evropën perëndimore. Tani infektimet po rriten shpejt me shifrat që kanë pësuar një katapultim nga java në javë.