Kreu i dyshuar i një familjeje kriminale irlandeze, i cili thuhet se ka kontrolluar një të tretën e furnizimit me kokainë të Evropës, është akuzuar zyrtarisht për drejtimin e një organizate kriminale. Daniel Kinahan, 49 vjeç, u transportua me avion në një bazë ushtarake në Irlandë të dielën në mbrëmje, pasi u ekstradua në Dublin nga Emiratet e Bashkuara Arabe. Ai u transferua menjëherë në një kompleks të posaçëm gjyqësor të krijuar fillimisht për të ndjekur penalisht terroristët republikanë, ku edhe u njoh me akuzën dhe u la më pas në paraburgim. Një operacion i konsiderueshëm ushtarak dhe sigurie u ndërmor për kthimin e tij pasi Irlanda siguroi ekstradimin nga Emiratet e Bashkuara Arabe. Avioni qeveritar që mbante në bord Kinahan u ul në pistën ushtarake afër Dublinit. Turma njerëzish ishin mbledhur për ta parë jashtë ndërtesës së gjykatës ndërkohë që dy autokolona mbërritën veçmas, me shpejtësi, mes një operacioni sigurie që përfshinte edhe trupa të armatosura.