Një ish-deputet tajlandez qëlloi për vdekje të hënën një zyrtar të qeverisë lokale në mes të ditës për një mosmarrëveshje financiare përpara se të arrestohej dhe të rrëfehej në stacionin e policisë. Sulmi ndodhi jashtë një ndërtese qeveritare në një provincë në veri të Bangkokut, vetëm disa ditë pas të shtënave në një shkollë në të njëjtin rajon që ngriti pikëpyetje mbi kontrollin e armëve në Tajlandë. I rrethuar nga oficerët e policisë pas arrestimit të tij, ish-deputeti tha se ishte përpjekur të fliste me zyrtarin lokal për paratë. "E ndoqa deri në makinën e tij dhe godita dritaren e makinës së tij, duke i thënë se dua të flas. Ai nuk pranoi, kështu që nxora armën", tha autori ndërsa qëndronte i ulur para gazetareve, duke pirë një cigare. "Nuk doja të qëlloja, por shoferi i tij nxori armën dhe e drejtoi nga unë, kështu që qëllova", shtoi ai. Viktima, i cili ishte kryetar i administratës së qeverisjes lokale, vdiq më vonë nga plagët e marra. Ai u godit në qafë dhe humbi shumë gjak, thanë mjekët. Edhe shoferi i tij u qëllua po ashtu në krahun e djathtë por iu nënshtrua një operacioni dhe tani është jashtë rrezikut për jetën.